កំពង់ចាម៖ ប្រធានមន្ទីរធម្មការ និងសាសនាខេត្តកំពង់ចាម លោក រ៉េត សារ៉ាត បានបញ្ជាក់ឱ្យ EAC news ដឹងថា ការកសាងកុដិវីឡាដ៏ស្កឹមស្កៃដែលស្ថិតនៅក្នុងវត្តគិរីសាលវ័ន ហៅវត្តថ្មី ឃុំទ្រាន ស្រុកកំពង់សៀម ខេត្តកំពង់ចាម បង្កឱ្យមានការភ្ញាក់ផ្អើល និងរិះគន់ថាសាងសង់ខុសពីទម្រង់រចនាបថខ្មែរនោះគឺខាងចៅអធិការវត្តមិនបានសុំការអនុញ្ញាតសាងសង់ត្រឹមត្រូវឡើយ។

បើតាមលោក រ៉េត សារ៉ាត វីឡាកុដិមួយនេះទើបតែដាក់ឱ្យប្រើប្រាស់ និងធ្វើបុណ្យឆ្លង កាលពីថ្ងៃទី០១ ខែមីនា ឆ្នាំ២០២៤ បន្ទាប់ពីសាងសង់អស់រយៈពេល ៦ឆ្នាំតាំងពីឆ្នាំ២០១៨ មកម្ល៉េះ។

ប្រធានមន្ទីរធម្មការ និងសាសនាខេត្តកំពង់ចាម បានថ្លែងដូច្នេះថា៖ «បើមើលតាមទិដ្ឋភាពជាក់ស្តែង គឺខុសពីរចនាបថខ្មែរយើង តាមបែបទំនើប បស្ចិមប្រទេស ប៉ុន្តែខាងក្នុងលោករៀបចំតាមបែបព្រះពុទ្ធសាសនា»។

លោកអះអាងថា លោកបាននិមន្តព្រះចៅអធិការវត្ត ព្រះគ្រូលោកគុណ ព្រះមេគុណ និងអាជ្ញាធរពាក់ព័ន្ធទាំងអស់មកចូលរួមប្រជុំនៅថ្ងៃស្អែកអំពីបញ្ហានេះ។

ពាក់ព័ន្ធនឹងព័ត៌មានលម្អិត និងមានវិធានការអ្វីបន្តទៀត លោកប្រធានមន្ទីរធម្មការថា លោកនឹងជម្រាបជូនបន្ថែមទៀតក្រោយពីកិច្ចប្រជុំចប់៕